Waa Maxay loop?

Sharaxaad

Haddaad rabto inaad daabacdo tirooyinka kow ilaa toban, waxaad ku qasban tahay inaad toban sadar isku celceliso. Haddaad boqol rabto, boqol sadar. Taasi ma aha shaqo xirfadle. Loop-ku wuxuu shaqada soo laalaabanaysa hal meel keenaa oo wuxuu ku leeyahay: "anaa qabanaya, ii sheeg meesha ay ka bilaabanayso iyo meesha ay ku dhammaanayso." Sidaas darteed saddex shay ayaa laga rabaa for loop: meesha uu ka bilaabmayo, condition-ka joojinaya, iyo tallaabada kordhinaysa.

Noocyada waaweyn waa saddex. for waa marka aad tirada garanayso. while waa marka aadan garanayn, oo aad joojinayso marka shuruudu diiddo, sida "sii akhri ilaa xogtu dhammaato". for...of iyo forEach waa marka aad liis marayso, xog kastana aad wax ka qabanayso. Dhinaca React, map ayaa loo isticmaalaa: array arday ah ayaad u beddelaysaa liis card ah oo bogga ku soo baxa. Digniin: condition-ka joojinta haddii uusan waligiis run noqon, waxaa dhacaya infinite loop, browser-kuna wuu istaagayaa. Wareeggaas ayaa sidoo kale ah habka AI agent-ku u shaqeeyo: fikir, tool isticmaal, natiijada eeg, kadibna ku celi ilaa hawshu dhammaato.

Tusaale

Copy
for (let i = 1; i <= 10; i++) {
  console.log(i);
}

Saddexdii shay waa halkan: i kow ayuu ka bilaabmayaa, i <= 10 ayaa joojinaya, i++ ayaa mid mid u kordhinaya. Toban sadar oo shaqo ah, saddex sadar ayay noqotay.

Halkee ayaad Dugsiiye ku baranaysaa?

Loops, arrays iyo map: JavaScript Masterclass iyo Baro JavaScript Af-Soomaali. Dhinaca Python, for iyo while: Ku Baro Python Af-Soomaali.